Seria e re e Samsung Galaxy S21: eksperiencë e pakrahasueshme me smartphone-in tuaj
Më shpejtë se çdo vit tjetër eventi i prezantimit të Serisë së re të smartphonëve Galaxy Samsung u mbajt në datën 14 Janar. Ashtu si edhe vitin e kaluar seria përmban 3 modele: Galaxy S21, Galaxy S21+ dhe Galaxy S21 Ultra, me tipare të reja për t’i ofruar konsumatorit një eksperiencë të pakrahasueshme. Le t’i shikojmë me detaje më poshtë.
Pajisjet dhe hardware-i
Për të krijuar një seri smartphonësh që do të jenë më të mirët në treg duhet mbi të gjitha hardware-i i duhur. Kështu e gjithë seria S21 është e pajisur me setin e çipëve më të fuqishëm që Samsung ka zhvilluar ndonjëherë, Exynos 2100.
Exynos 2100 ka 8 core procesimi për performancë maksimale. Për më tepër ai përfshin edhe qarkun grafik Mali-G78MP14 i cili siguron 35% më shumë fuqi se smartphonët e gjeneratës së mëparshme.
Përsa i përket memories, si Galaxy S21 ashtu dhe Galaxy S21+ kanë 8GB RAM dhe 128GB ose 256GB version memorie. Ndërkohë që Galaxy S21 Ultra vjen me 12GB RAM dhe memorie 128GB.
Ekrani
Galaxy S21 Ultra 5G, duke qenë edhe modeli kryesor i serisë, është pajisja më e madhe me ekranin Dynamic AMOLED 2X, 6.8”. Rezolucioni i ekranit është 3200x1440 pixela dhe mundëson një shkallë rifreskimi nga 10Hz në 120Hz. Ekrani është i mbrojtur me Gorilla Glass Victus, ndërkohë që është në gjendje të suportojë cilësi të videos HDR10+, me një maksimum ndriçimi prej 1500 nits.
Surpriza më e madhe përsa i përket ekranit të Galaxy S21 Ultra lidhet me faktin se ai është i vetmi ekran në serinë S21 që suporton teknologjinë Wacom për përdorimin e lapsit. Në fakt Samsung ka njoftuar se janë dy modele të lapsit që përshtaten me Galaxy S21 Ultra, i mirënjohuri S-Pen dhe modeli i ri S-Pen Pro, të cilët mund të blihen si aksesorë të veçantë.
Përsa i përket ekranit të dy modeleve të tjera Galaxy S21+ dhe Galaxy S21, edhe ato kanë teknologjinë Dynamic AMOLED 2X me shkallë rifreskimi nga 48Hz në 120Hz. Përmasat përkatëse janë 6.7” dhe 6.2” ndërkohë që rezolucioni është në të dy rastet 2400x1080 pixela. Edhe ato janë të pajisura me Gorilla Glass Victus për mbrojtje maksimale por maksimumi i ndriçimit është më i ulët, 1300 nits.
Kamerat
Edhe për këtë vit, Samsung ka vendosur që modeli kryesor i serisë Galaxy S21 Ultra të vijë me tipare të diferencuara nga dy modelet e tjera.
Kështu Galaxy S21 Ultra 5G është i pajisur me një sistem prej 4 kamerash. Kamera kryesore është 108MP me lente të gjerë 26mm. Kamera e dytë është 12MP me lente ultra të gjerë. Dy kamerat e tjera janë 10MP, të dyja me lente 70mm (3x optical zoom) dhe 240mm (10x optical zoom). Kamera për selfie është 40MP me një lente të gjerë.
Dy modelet e tjera Galaxy S21 5G dhe S21+ 5G kanë të njëjtin sistem me tre kamera. Kamera bazë ka një rezolucion prej 12MP, me lente të gjerë. Kamera e dytë është gjithashtu 12MP, me lente Ultra të gjerë. Kamera e tretë është 64MP dhe gjithashtu ka një lente të gjerë. Për funksionin selfie të dy pajisjet kanë një kamera 10MP me lente të gjerë.
Megjithatë të tre modelet janë në gjëndje të suportojnë Auto-HDR, Dual-video call, regjistrim të videove me rezolucion maksimal 8K, si dhe video me ngadalësim me rezolucion 720p.
Bateria
Të tre pajisjet mundësojnë karikimin e shpejtë me 25W, karikimin e shpejtë wireless me 15W, dhe Wireless PowerShare që mundëson karikimin wireless të pajisjeve të tjera që përshtaten (smartphone të tjerë apo Galaxy Buds Pro). Si kapacitet, bateria e Galaxy S21 Ultra 5G është më e madhja me 5,000mAh, ajo e Galaxy S21+ pak më e vogël me 4,800mAh dhe bateria e Galaxy S21 ka një kapacitet prej 4,000mAh.
Smartphone-t e hedhur në treg së fundmi duket se po i kushtojnë rëndësi mbrojtjes së mjedisit duke mos përfshirë në paketimin e produktit, karikuesin dhe kufjet, dhe duke nxitur konsumatorët që të ripërdorin aksesorët që tashmë disponojnë.
Software
Seria Samsung Galaxy S21 operon me ndërfaqen e re One UI 3.0 e cila bazohet në versionin e fundit të sistemit të operimit të Google, Android 11. Kështu të tre modelet e serisë më të re ofrojnë tipare të reja të përmirësuara si: personalizim i mëtejshëm i faqes kryesore, transferim më i lehtë i të dhënave nga smartphonat e mëparshëm, galeri fotosh e përmirësuar me funksione të avancuara për editimin e fotove tuaja, tipare të avancuara për lojrat etj.
Ngjyrat
Gjeneratë e re do të thotë edhe ngjyra të reja. Galaxy S21 është e disponueshme në ngjyrë të bardhë, gri, vjollcë dhe rozë. Galaxy S21+ është në ngjyrë gri, të zezë dhe vjollcë, ndërkohë që Galaxy S21 Ultra është i disponueshëm vetëm në tonalitetet e argjendit dhe të zezës. Të tre modelet janë tashmë të disponueshme për t’i blerë apo për ti porositur.