A e keni menduar se cila është temperatura ideale e frigoriferit tuaj?

Përsa i përket sigurisë së ushqimit, nga studimet që janë bërë në Europë, është konstatuar se pjesa më e madhe e rasteve të helmimit nga ushqimi vjen si pasojë e ruajtjes së keqe të tij brenda në shtëpi.  

Kjo do të thotë që prishja e ushqimeve ndodh në “stacionin e fundit” para se ushqimi të përfundojë në pjatë. Prandaj shëndeti juaj varet ngushtësisht më mënyrën se si ju ruani ushqimet. 

Në pjesën më të madhe të rasteve kjo është një detyrë që i përket frigoriferit. Kjo pajisje mund të zgjasë periudhën e kohës për konsumimin e sigurtë të produkteve që ju blini. Duke ditur që në temperaturë ambjenti bakteret në ushqimet që prishen, dyfishohen çdo 20 minuta është e rëndësishme jo vetëm që të fusni ushqimet në frigorifer sa më shpejtë të jetë e mundur por gjithashtu të keni temperaturën e duhur për ti ruajtur ato. 

Po cilat janë kushtet ideale?

Ekspertët thonë se pjesa e sipërme e frigoriferit duhet të mbahet në një temperaturë 2 deri në 4 gradë celcius.

Midis dy vlerave të mësipërme, idealja do ishte të qëndronim më afër temperaturës 2 gradë celcius pasi limiti më i lartë prej 4 gradë mund të mos jetë i përshtatshëm për produktet më të ndjeshme si përshembull bulmetet. Nga ana tjetër nuk duhet të afrohemi shumë temperaturës 0 gradë që të mos lejojmë krijimin e shtresave të mundshme të akullit.

Për pjesën e ngrirjes, tavani është -19 gradë celcius, kështu që temperatura duhet të jetë më e ulët se kaq.

Sa kohë “durojnë” ushqimet jashtë frigoriferit

Rregulli i përgjithshëm është se ushqimet që ruhen në frigorifer nuk duhet të qëndrojnë në temperaturë ambjenti më shumë se 2 orë. Edhe në dimër duke qënë se ambjenti është i ngrohtë brenda, i njëjti rregull vlen.  

Nëse është verë kjo kohë është edhe më e shkurtër. Duhet të keni veçanërisht kujdes me ushqimet që prishen si mishi, peshku dhe vezët. Maksimumi i kohës që këto produkte mund të qëndrojnë jashtë frigoriferit në verë është jo më shumë se 1 orë. 

Edhe ushqimet e gatuara duhet ti përmbahen këtij rregulli. Megjithatë në këtë rast duhet të keni kujdes që ato të jenë në temperaturë ambjenti para se të futen në frigorifer. Për këtë qëllim ju mund ti zhysni enët ku i mbani në ujë të ftohtë.  

Kjo gjë është shumë e rëndësishme, jo vetëm sepse frigoriferi do harxhojë më shumë energji për të ulur temperaturën por edhe sepse nëse i fusim ushqimet e nxehta, rrezikohet krijimi i mykut.