20
Apr

Neptun ndihmon nxënësit e shkëlqyer të mësojnë online

1170 Herë lexuar |

Neptun ka dhuruar tableta për nxënësit e shkëlqyer në mësime por që nuk kanë mundësi ekonomike të blejnë pajisjet e nevojshme teknologjike për të ndjekur programin mësimor online. Tabletat Neptun ja dorëzoi Bashkisë së Tiranës që do të bëjë shpërndarjen e tyre te nxënësit nëpërmjet Shërbimit Social.

I pranishëm gjatë dorëzimit të këtyre pajisjeve teknologjike nën-Kryetarja e Bashkisë së Tiranës, Anisa Ruseti, tha: “Për Bashkinë e Tiranës arsimimi dhe përdorimi i teknologjisë janë shumë të rëndësishme

sidomos në këtë moment kur të gjithë duhet të qendrojmë në shtëpi. E vlerësojmë jashtë mase ndihmën dhe kontributin tuaj që shkon kryesisht për edukimin dhe për ata fëmijë në nevojë që kanë më pak mundësi së të tjerët. Tabletët do të shkojnë për fëmijët që janë me rezultate të mira në mësime. Të gjithë tabletët që ju do të na jepni, ne do tua përcjellim punonjëseve tona të mbrojtjes së fëmijëve, që më pas do t’ua dorëzojnë këtyre të fundit, sipas edhe porosisë tuaj.”

Drejtori i marketingut i Neptun Albania, Drini Dushku, u shpreh se “Që nga fillimi i krizës, të gjithë nxënësit dhe studentët janë duke mësuar online në kushte shtëpie por jo të gjithë kanë mundësi të studiojnë në këtë mënyrë për shkak të mungesës së paisjeve të duhura të teknologjisë dhe kushteve ekonomike. Ne si Neptun jemi njohur me këtë situatë dhe kemi vendosur të japim kontributin tonë duke dhuruar disa tabletë që nxënësit në vështirësi ekonomike por që njëkohësisht janë edhe të shkëlqyer në mësime të mund të vazhdojnë të ndjekin programet mësimore online. Nëpërmjet tabletave nxënësit mund të lidhen online dhe te ndjekin mësimin për të mos humbur asgjë nga programi online i ndërtuar nga Ministria e Arsimit. Gjithashtu duam te falenderojmë edhe Bashkinë e Tiranës qe po na ndihmon me identifikimin e shpejtë të këtyre nxënësve.”

Dhurimi i Tablëtëve nga ana e Neptun ka qënë një nismë e mbështetur nga Presidenti i Grupit Balfin, Samir Mane si pjesë e ndihmës që po jep Grupi Balfin gjatë krizës së COVID-19 në gjithë vendin.

 Kriza e shkaktuar nga përhapja e COVID-19 ka krijuar një sfidë për të gjitha institucionet. Përballimi i krizës ka bërë që shumë institucione të përshtasin aktivitetin e tyre të përditshëm dhe teknologjia vjen në ndihmë. Neptun, si rrjeti më i madh i teknologjisë së fundit në Shqipëri, po mbështet përdorimin e teknologjisë për të kufizuar daljet jashtë por pa ndërprerë një pjesë të aktiviteteve të mëparshme. Ashtu si në rastin mësimit online ku janë ndihmuar nxënësit për të ndjekur mësimin online, Neptun është duke mbështetur bizneset që të zhvillojnë punën nga shtëpia dhe ccdo qytetar tjetër me blerjen e pajisjeve teknologjike online dhe dërgesën në shtëpi.